តើជំងឺថប់បារម្ភគឺជាអ្វី?
ជំងឺថប់បារម្ភ គឺជាជំងឺផ្លូវចិត្តម្យ៉ាងដែលកើតមានញឹកញាប់។ វាគឺជាចង្កោមនៃជំងឺផ្លូវចិត្តដែលកំណត់ដោយអារម្មណ៍ថប់បារម្ភ និងការភ័យខ្លាចយ៉ាងសំខាន់ និងមិនអាចគ្រប់គ្រងបាន ដែលនាំឲ្យសង្គម ការងារ និងមុខងារផ្ទាល់ខ្លួនរបស់មនុស្សម្នាក់មានការចុះខ្សោយយ៉ាងខ្លាំង។ ការថប់បារម្ភ អាចបណ្តាលឱ្យមានរោគសញ្ញាផ្លូវកាយ និងការយល់ដឹង ដូចជាការថប់បារម្ភ ឆាប់ខឹង ឆាប់អស់កម្លាំង ពិបាកផ្តោតអារម្មណ៍ បេះដូងលោតញាប់ ឈឺទ្រូង ឈឺពោះ និងរោគសញ្ញាផ្សេងៗដែលអាចប្រែប្រួលអាស្រ័យលើបុគ្គល។ ជាទូទៅ អ្នកជំងឺថប់បារម្ភ រមែងគិត និងព្រួយបារម្ភច្រើន (ហួសហេតុ) អំពីរឿងរ៉ាវក្នុងជីវិត ដូចជាគិតពីបញ្ហាការងារ បញ្ហាមុខរបរ ពីអនាគតកូនចៅ បញ្ហាគ្រួសារ និងជាពិសេសពីបញ្ហាខ្វះខាតក្នុងជីវភាព ។ល។ វាគឺជាជំងឺដែលអាចកើតឡើងចំពោះមនុស្សគ្រប់វ័យ។ នៅពេលដែលយើងមានអារម្មណ៍ធុញថប់ ព្រួយបារម្ភហួសប្រមាណ ឬភ័យស្លន់ស្លោនឹងបញ្ហាអ្វីមួយ ទាំងអស់នេះហើយដែលជាកត្តារំខានដល់សកម្មភាពប្រចាំថ្ងៃរបស់អ្នក និងអាចថាយើងមានជំងឺថប់បារម្ភ។
រោគសញ្ញានៃជំងឺថប់បារម្ភ
រោគសញ្ញានៃជំងឺថប់បារម្ភទូទៅ រួមមាន៖
- មានអារម្មណ៍ភ័យ មិនស្រួល ឬមានភាពតានតឹង
- កើតមានអារម្មណ៍ថាមានគ្រោះថ្នាក់ជិតមកដល់ ភ័យស្លន់ស្លោ
- ចង្វាក់បេះដូងកើនឡើង
- ដកដង្ហើមញាប់
- បែកញើស
- ញ័រ
- មានអារម្មណ៍ខ្សោយ ឬអស់កម្លាំង
- កើតមានបញ្ហាក្នុងការផ្ដោតអារម្មណ៍ ឬគិតអំពីអ្វីផ្សេងក្រៅពីកង្វល់បច្ចុប្បន្ន
- មានបញ្ហាក្នុងការគេង
- ចួបប្រទះបញ្ហាក្រពះពោះវៀន
- ពិបាកក្នុងការគ្រប់គ្រងអារម្មណ៍ទុក្ខព្រួយ ឬចង់រត់គេចពីបញ្ហា
ផលវិបាក
ប្រសិនបើយើងមានបញ្ហាថប់បារម្ភ ហើយមិនស្វែងរកការព្យាបាលទាន់ពេលវេលា នោះវាអាចធ្វើឲ្យយើងមានជំងឺបាក់ទឹកចិត្ត ឬជំងឺផ្លូវចិត្ត អាចឈានដល់ប្រើប្រាស់សារធាតុញៀន ពិបាកគេង ចួបបញ្ហាប្រព័ន្ធរំលាយអាហារ ឈឺក្បាល ឬឈឺក្បាលរ៉ាំរ៉ៃ ពិបាកធ្វើការ ចង់តែនៅម្នាក់ឯង និងអាចឈានដល់ការសម្លាប់ខ្លួនទៀតផង។
វីធីដោះស្រាយ
យើងអាចជួយអ្នកមានជំងឺថប់បារម្ភបានតាមរយៈវិធីមួយចំនួនដូចជា៖
- លំហាត់សម្រាកចិត្ត-កាយ
- តាមរយៈការពិគ្រោះយោបល់ ឬការផ្តល់ប្រឹក្សា
- វិធីតាមបែបប្រពៃណីបុរាណ
- វិធីព្យាបាលដោយគ្រូពេទ្យ។
តើគួរទៅចួបគ្រូពេទ្យនៅពេលណា?
ប្រសិនបើអ្នកចេះតែគិតថា៖
- មានអារម្មណ៍ព្រួយបារម្ភច្រើនរំខានដល់ការងារ ទំនាក់ទំនង ឬផ្នែកផ្សេងៗទៀតនៃជីវិត
- មានការភ័យខ្លាច ការព្រួយបារម្ភ ឬការថប់បារម្ភធ្វើឱ្យតូចចិត្ត និងពិបាកគ្រប់គ្រង
- មានអារម្មណ៍ក្រៀមក្រំ មានបញ្ហា និងការប្រើប្រាស់គ្រឿងស្រវឹង ឬគ្រឿងញៀនលើសកម្រិត ឬមានការព្រួយបារម្ភអំពីសុខភាពផ្លូវចិត្ត
- គិតថាការថប់បារម្ភអាចជាប់ទាក់ទងនឹងបញ្ហាសុខភាពរាងកាយ ឬ
- មានគំនិតគិតចង់ធ្វើអត្តឃាត
ប្រសិនបើអ្នកមានរោគសញ្ញាដូចដែលរៀបរាប់ខាងលើ សូមប្រញាប់ទៅចួបគ្រូពេទ្យ ឬអ្នកផ្ដល់សេវាសុខភាពផ្លូវចិត្ត មុនពេលជំងឺថប់បារម្ភកាន់តែធ្ងន់ធ្ងរឡើង។ វាអាច និងងាយស្រួលក្នុងការព្យាបាលប្រសិនបើយើងទទួលបានការព្យាបាលទាន់ពេលវេលា។
អត្ថបទទាក់ទង
វិធីសាស្រ្ត ៨ ចំណុច ដើម្បីសម្រេចបាននូវសុខដុមរមនាក្នុងជីវិតការងារ និងផ្ទាល់ខ្លួន